ذاكرة المصري ذاكرة سمكة .. للتاريخ حتى لاننسى

مش هنسى فساد المحليات والمحافظات وانتشار الرشاوي على مدار 30 سنه لمبارك

مش هنسى تحويل الشرطة اداة لقمع الناس وطغيان امن الدولة لكل من يعارض مبارك

مش هنسى ان عشان افتح شركة دعايا او مطبعه  لازم تصريح من امن الدولة

مش هنسى فساد الجيش وتحويل المصانع الحربية لمصانع انتاج حلل وسخانات وتضاخم ثروات الجيش من صفقات السلاح وعدم تحديث الجيش وتدني الخدمة العسكرية وكان العسكري يدخل عشان يخدم ف بيت عقيد او يشتغل سيكا

مش هنسى تعيين القضاة ووكلاء النيابة لأولادهم وغياب العدالة والقانون

مش هنسى الخصخصة وخروج والدي من شركة النصر للسيارات بعد ماخربت وقسموها للبيع بعد ماكانت ااكبر شركة لانتاج السيارات ف الشرق الاوسط ف عهد عبدالناصر  . ومش هنسى شركات المحلة للغزل والنسيج وغيرها

مش هنسى عبارة السلام , والاغذية المسرطنة على يد يوسف والي , واهدار كرامة ودم المصريين بالخارج على يد الخارجية والسفارات ف دول العالم وموقفهم المتخاذل

مش هنسى احتكار حاشية جمال وعلاء للسوق المصري واللي يعارضهم ييقى مصيرة زي الريان وابو الفتوح وهشام طلعت .

مش هنسى اننا خرجنا يوم 25 يناير لتغيير نظام فاسد مستبد وكان هدفنا نبيل ولكن للاسف لم يكن لدينا معارضة قوية او قائد قوي على الارض وبالتالي ركبها الاخوان ( الفصيل الوحيد المنظم والاقوى ف الشارع )

مش هنسى تستر طنطاوي لمبارك وتفتيتة للشعب بأول لعبة وهي استفتاء مارس ولا هنسى جرائمة في سنه ونص

مش هنسى جرائم الاخوان واستبدادهم وتصارعهم مع كل قوى الدولة للاستحواذ على مفاصل الدولة لتحويلها لفاشية دينية تخدم مصالحهم

مش هنسى تكفيرهم لكل من يعارضهم وترك ملشياتهم لقتل المتظاهرين ف الاتحادية وغيرها

مش هنسى فشل مرسي داخليا وخارجيا حتى في اختيارة للوزراء

مش هنسى اننا نزلنا يوم 30 يونيو عشان نشيل نظام فاشي ديني مستبد لا يفرق عن نظام مبارك بل اوسخ منه بكثير

مش هنسى اننا مازلنا ضعاف ومشتتين ولا يوجد سوا البديل الاقوى على الارض للأخوان وهو الفلول ( نظام مبارك ) وبالتالي سيعود للحكم بأقوى ماكان

مازلنا بنقع وبنقوم بس مبارك مش هيرجع للحكم حتى لو تلون نظامة ليعود فلن يكون بنفس بشاعه مبارك وتورثية لجمال

والاخوان لن تعود ويكفى اننا هدمنا اسطورة الاخوان الضعفاء المساكين على مدار 80 عام مضت

اة الثورة مستمرة . بس ثورة العقول . ثورة لفرز الناس من المتلون ومن المنافق ومن الخائن ومن المتاجر بالدين..

حد فاهم حاجة

إيران مع بشار الاسد

دول الخليج ضد بشار

بشار ضد اﻹخوان

اﻹخوان ضد السيسي

دول الخليج مع السيسي

الخليج ضد اﻹخوان

إيران مع حماس

حماس مع اﻹخوان

أمريكا مع اسرائيل

حماس ضد أمريكا

دول الخليج مع أمريكا

امريكا ضد القاعدة

القاعدة ضد بشار

دول الخليج مع القاعدة في سوريا

دول الخليج ضد المعارضة البحرينية

المعارضة البحرينية مع تمرد في مصر .

حسني سجن مرسي

مرسي سجن حسني

مرسي رجع السجن

حسني طلع من السجن

total recall

صحيح بيقولو النسيان نعمه بس هل فعلا نسينا

فيلم توتال ريكول كان فية جهاز بيعرض زكريات المخ وممكن ياخدها كوبي ويفضيها

فاكر لما عرفت بنت الجيران ف اولى ثانوي زي مايكون النهاردة وهي الان متجوزة وعندها اولاد ونسيت حتى اسمي

فاكر لما ف خمسة ابتدائي لما كان رامي حسين بياخد مني السندويتشات بالعافية ولما محمد فوزي كان يبفتن عليا ف حصة العربي

فاكر لما شوفت الكعبة بعيني اول مرة احساسي مايتوصفش كأنة كان لسه من ساعه

فاكر ابلة حورية ف تانية ابتدائي وعصام بتاع الرياضة لحد خمسة ابدائي وحافظ شكلهم كأنهم عايشين معانا

فاكر حبي وجرحي فاكر كل شخصيات مرت عليا لمجرد اقعد لوحدي افتكرها

اومال نسيان ايه بقى دا انا اكتشفت ان الزمن والاحداث مجرد مسكن يخفف عني

انا نفسي ف الجهاز دا 

ثورة عقول 3

استقوائك بامريكا واسرائيل والغرب لن يرجع حكم الاخوان حتى لو قُتل السيسي نفسه . فهم يعلمون جيدا ان الشعب المصري كله يلفظهم واصبحوا منبذوين . ولكن مايفعلوة الان هو محاولة لكسب عطف العالم مثل اليهود بعد محارق هتلر والبعض الاخر منهم يعتبره جهاد في سبيل الله . 

لو نظرت لميزان القوى العالميه سترى ان القوة العظمى المسماة امريكا فقدت الكثير من رصيدها في المنطقة العربية من حلفاء وسقوط حليف اخر اسمه الاخوان المسلمون وفي الجانب الاخر ترى صعود العملاق الصيني وايضا محاولة روسيا وحلف الناتو استرجاع حلفائها في المنطقة ولك في موقفهم من سوريا عبرة .. السيسي ليس بالغباء الذي يجعله يتحدى امريكا دون ان يكون مدعوم بقوة اخرى . اقرا التاريخ ودعم السوفييت لعبد الناصر ثم طرد السادات لهم ومحاولته لمداعبة القوة الصاعدة وقتها امريكا . ثم مبارك .. لابد ان نعترف اننا مازلنا اضعف من ان نواجه قوة عظمى لوحدنا دون دعم من قوى اخرى عظمى . لعبة تبادل ادوار . ولكن في كل الاحوال التاريخ لن يعود للوراء والاخوان كارت تم حرقة في مصر للابد. 

ثورة عقول 2

قبل ان تحدثني عن الانقلاب العسكري حدثني عن اكثر من 33 مليون خرجوا للشوارع ومثلهم بالبيوت يرفضون حكم الاخوان . بعيداً عن مصائب حكم سنة لمرسي . لماذا كل هذا العدد خرج ؟ اسأل نفسك لماذا كل هذا النبذ المجتمعي لكم الأن ! هل تتذكر ( موتوا بغيظكم ) الان لم نمت بغيظنا ولكننا خرجنا لتموتوا انتم ولكن بحسرتكم على ما صنعتموه من عداوه , والله لو كنتم حكمتم فعلا بالشريعه وبالعدل وبالتسامح لما كان ليخرج كل هذا العدد ضدكم ولا كان الف سيسي لينقلب عليكم ولكن الله اعطاكم فرصة بعد 80 عام لتضيعوها في سنة ( اذا رايتم رجل الدين يتمسك بالمنصب فلا تولوه ) .. هل المنطق عندكم اما ان نحكم واما ان نموت جميعا ! اهذا هو الاسلام ؟ . اذا كنتم دعاة اسلام فهل مايحدث الان في العريش وسيناء والله اعلم اين سيحدث غدا من تفجيرات وقتل لمصريين هذا هو نصرة للاسلام ! على الاقل هل هذا سيعيد حكم مرسي ! والله لن يزيدكم الا كره ونبذ من المجتمع . هل منهج التفجير وسط المدنيين (منهج طالبان والقاعده ) هو الجهاد بعينة تفجيرات البنتاجون ولندن هل افادت المسلمين بشئ ام قلبت الغرب اكثر علينا ولتشوية صورتنا ؟ عندما تفجر كمائن شرطة بسيناء وتقتل ظباط جيش في مطار العريش هل ذلك هو اعادة لمرسي ام نصرة للاسلام ؟ والله الاسلام منكم برئ 

ثورة عقول 1

المكسب الاساسي بالنسبة لي في الثورة هو اظهار معادن الناس وحقيقة امور كتيرة كنا نجهلها . فأنا شخصيا صدمت في كثير من الشخصيات الدينية والتي كنت استمع إليها بشدة قبل الثورة ومنهم وجدي غنيم مثلا . وايضا معرفتي بحماس وايضا معرفتي بالاخوان المسلمين وامور كثيرة غيرها تعرت حقيقتها امامي . مايحدث الان من قتل وتفجير بأسم الدين لا يمت بصلة للدين والاسلام منها برئ , لماذا لم تحرر حماس القدس للان . لماذا توجد القاعدة وطالبان في كل دول العالم الا فلسطين ! اليس الاولى بهم ان يأتوا ليحرروا القدس . القاعدة التي ساعدت في تحرير دول من السوفييت ليست قادرة ان تدخل تحرر مدينة ! الجهل الذي نحن فيه ليس منذ ولادتنا وانما يمتد لأجدادنا ويصعب علينا مجرد التخيل اننا واجدادنا تربينا خطاَ او حتى نستوعب ذلك ؟ عند خروج الاحتلال من معظم الدول العربية كان لابد من وجود بديل يحفظ تحقيق مصالحهم ويحفظ امنهم . فجامعة الدول العربية صاحب فكرتها بريطانيا لتلهي بها العرب ! فقول لي ماذا قدمت جامعة الدول العربية حتى اليوم ؟ الاخوان المسلمين ساعد في انشائها بريطانيا وابحث في اصول حسن البنا ؟ قد تصعق الان وتقول اتقي الله يا اخي دول ناس بتوع ربنا . طيب واذا قلت لك ان الوهابية نشأت بمباركة امريكية . فماذا قدم محمد ابن عبد الوهاب ؟ لقد قدم اسلام جديد يحفظ امن امريكا واسرائيل ولم تحرر فلسطين . يكتفي بشيوخ الوهابية بالدعاء كديكور . لم يقتل من شيوخ العرب الا القليل الذي يعرف الاسلام الحق وله خطورة عليهم . طبعا لو عايز ادله على كلامي تقدر ترجع للتاريخ والكتب كتير بس قبل ماتقرا نفض عقلك وجردة من اي مشاعر او عواطف او تعصب لشئ معين . 

مين اللي يقدر ساعه يحبس مصر

مين اللي يقدر ساعه يحبس مصر ؟ محدش يقدر طبعا

مهما طال الظلام لابد من يوم يطلع فيه النهار ونتنفس فيه الحريه

جرافيتي قمت برسمه على احد حوائط جريدة المواطن مستخدماً الوان Soft Pastel

عبثيــات 1

قمة العبث انك تدرس اشياء مش بتحبها ومش هتفيدك في شغلك وتجبر نفسك وتعصر لمونه على نفسك عشان تدرسها لمجرد المجتمع عايز كدا . لا والاكثر عبثاً  انك مهما اشتغلت وبنيت لك كارير معين هتفضل في نظر الناس فاشل لمجرد انك ماخلصتش شهادتك الي مش هتشتغل بيها ومش في مجالك اللي بتبنيه  وشغال فيه.

احنا عايشين في مجتمع متناقض بيبص للشكليات والمظاهر بغض النظر عن الأساس, لما تلاقي الطفل من صغرة أبوة وامة عايزين يطلعوة يا دكتور يا اما مهندس ويفضلو يحشوا الفكرة في دماغ الطفل لحد مايكبر ويتصدم في الثانوية العامة انه ماقدرش يدخل كلية الطب او الهندسة عشان تنسيق عقيم لا يمت بصلة لقدرات الطالب ولا لواقع الكليات . ويبدأ التناقض بأنه يدخل اي كلية بعيدة عن مواهبه او قدراته  ناهيك عن انه لو فكر يدخل كلية بيحبها ومش على هوا اهله زي فنون جميلة او تربية موسيقية او سينما مثلا تلاقي اهله ماسكينة تريقة ( فنون جميلة ايه اللي تدخلها دي بتاعت البنات والعالم الفشلة اللي مالهاش شغلانه ) و ( تربية موسيقية ايه اللي عايز تدخلها ! ودي هتخرج تشتغل ف شارع الهرم ولا هتطبل ف زفه ) وغيرها من الجمل السخيفة العبثية . فيضطر الولد ان يدخل اي كلية بدون مايعرف قدراته فيها ويبتدي يواكب المجتمع ويحشو دماغة بكتب ومذكرات المعيدين لمناهج بعيدة عن ارض الواقع وسوق العمل . وبعد مايخلص الكلية بأعجوبة يستلم شهادتة ويتصدم مرة اخرى اول ماينزل سوق العمل ويكتشف ان كل اللي درسة مالوش علاقة بالشغل ف السوق ,  وتبدأ مرحلة عبثيه جديدة فيروح يبروز الشهادة ويعلقها ع الحيطة كديكور وينزل يشتغل اي حاجة ويفضي دماغة من كل حاجة درسها عشان يتأقلم مع الشركة او المصنع او حتى البقالة اللي شغال فيها . ويصبح كل همه جمع الفلوس وبس .عايش عشان ياكل ويشرب واقصى طموحاتة واحلامة هو اني اجيب شقة وعربية واتجوز كمعظم احلام الشباب العربي !! هل اصبحت الحقوق أحلام ؟ هل تم اختذال احلامنا في حقوق ضايعه منا زي المسكن والملبس والحياة الكريمة وزوجة صالحه ؟؟ فين احلامك بأنك تضيف حاجة للمجتمع من خلال مشروع يفيد البشرية في مجال معين ؟ .

والأكثر عبثاً انك تلاقي الوالد بيقولك شايف فلان ناجح ازاي ماشاء الله وجايب شقة وعربية !! هو دا مقياس النجاح عندكم !!

وتلاقية بيقولك برضو فلان ما شاء الله ربنا فتح عليه وبيشتغل في شركه بيقبض منها مرتب كذا ألف جنيه ! يا سلام طب ما تاجر المخدرات بيكسب ألاف الجنيهات ف الشهر وتجار العملة بيكسبوا ألاف الجنيهات ف الشهر.

لماذا أصبح مقياس النجاح وقيمة الانسان  تقدر بالفلوس والمظاهر !

اصبحنا متخلفين في قاع العالم وسنظل متخلفين طالما نفكر ونعيش بهذه الطريقة ونعتقد في نفس الوقت اننا نربي أجيالاً ناجحه .قبل ان نلقي اللوم على الجيل الحالي من الشباب بأنه ضائع ومستهتر  لوموا انفسكم يا جيل الخمسينات والستينات فأنتم الذين خلفتونا وربيتونا على افكار عقيمة قد ورثتوها من ابائكم ...

Loser

it will rain again

all what happened at the last two years, i just need it rain again..